- Un ano máis a gran cita das categorías de promoción do atletismo galego en pista cuberta, o Trofeo ABANCA, regresará ao sintético de Expourense o vindeiro día 11 de decembro en xornada de mañá e tarde.
Desta vez son un total de quince equipos os que tomarán parte nesta auténtica festa do atletismo base que é o Trofeo ABANCA. Farano baixo a atenta mirada dun importante número de adestradoras e técnicos quen estarán atendendo e acompañando aos preto de medio milleiro de atletas inscritas e inscritos das categorías Sub-10, Sub-12 e Sub-14. O escenario desta competición de base será Expourense.
Nesta décima edición do Trofeo ABANCA foron as entidades do ADAS CUPA e a Sociedad Gimnástica de Pontevedra as que lograban a súa clasificación no total das seis categorías posibles, destacando de igual modo aos equipos da Atlética Lucense, Club Atletismo Sada, Club Atletismo Narón e Club Deportivo la Purísima con cinco equipos clasificados.
As probas oficiais nas que se tomará parte en función das distintas idades serán:
- Categoría Sub-10: 50 m., 500 m.; 1.000 m.; altura, lonxitude e peso.
- Categoría Sub-12: 60 m., 500 m.; 1.000 m.; altura, lonxitude e peso.
- Categoría Sub-14: 60 m., 500 m.; 1.000 m.; 2.000 m.; 60 valos, altura, pértega, lonxitude, triplo e peso.
O Trofeo ABANCA ten como filosofía a aprendizaxe e a promoción
O Trofeo ABANCA de pista cuberta de atletismo ten como filosofía a promoción e a aprendizaxe da actividade atlética entre as categorías máis inferiores do atletismo galego, sendo un dos seus obxectivos o fomento dos valores fundamentais do deporte a través dun sistema de competición por equipos.
Ao longo das nove edicións xa disputadas, das que tan só se deixou de celebrar no 2020 pola situación pandémica existente, o club que máis triunfos suma é o Atletismo Vila de Cangas cun total de dez títulos, seguido polo Ourense Atletismo con oito, ADAS CUPA con seis e Atletismo Sada con tres.
🔴Relación de equipos clasificados para tomar no Trofeo ABANCA de pista cuberta do vindeiro día 11 de decembro en Expourensehttps://t.co/ULQsajloNc pic.twitter.com/SDBynMzZMF
— Atletismo Galego (@atletismogalego) December 1, 2022