Ata catorce deportistas galegas participarán esta fin de semana no Segundo Clasificatorio Campionato de España de Tríatlon en modalidade Sprint. A competición terá lugar na localidade vasca de Portugalete e disputarase o vindeiro domingo, 13 de xuño.
As atletas galegas que compitan en elite e júnior deberán completar unha volta de 750 metros na proba de natación, tres voltas de 6,6km nun circuíto técnico e sinuoso na proba ciclista e finalmente dúas voltas de 2,5km nun terreo chan. Na categoría Youth, a competición consistirá nunha volta de 250 metros en natación, unha volta de 6,6 km en ciclismo e unha volta de 1,6 km en carreira. Neste torneo de tríatlon compiten un total de 494 atletas, 153 delas mulleres.
En total, as deportistas galegas representan a seis clubs distintos: AD Náutico de Narón, Inforhouse Santiago, AD TRI Penta Terras de Lugo, Cidade de Lugo Fluvial, Tríatlon Ferrol e Motorbike Galaico Pontevedra.
Estas son as galegas que estarán no Clasificatorio de tríatlon
Na categoría de maior nivel, a eilte feminina, participan seis galegas dun total de 71 participantes. A deportista Aira Galban, do Inforhouse Santiago, parte como unha das favoritas, seguida de preto pola súa compañeira de equipo Adriana Pensado.
Tamén competirán en elite María Tania Alcalde, do club santiagués, Ana María Santiso, do AD Náutico de Narón e Inés Castaño e Miriam Trigo, do AD Penta Terras de Lugo.
No seguinte nivel, a Proba de Selección Júnior Feminia, só haberá dúas galegas entre as vinte participantes: Carla Guisande e Ana Patricia Mulet, ambas do Cidade de Lugo Fluvial.
Finalmente, na Proba de Selección Youth haberá un total de 62 competidoras, das cales seis son galegas. Nesta competición estarán María Filgueiras e Sabela Caneiro, do Ferrol, Victoria Anna, do Motorbike Galaico Pontevedra, Lucía Piñón, do AD Náutico de Narón, Lucía Darriba, do Cidade de Lugo Fluvial e Ainoa Gontán, do Inforhouse Santiago.
