Ás 14:00 horas de onte, xoves, finalizaba o prazo que tiñan os clubs con dereito a iso para realizar as correspondentes inscricións nestas fases de ascenso e formalizar a totalidade da documentación requirida.
Na modalidade de fútbol sala dous equipos femininos galegos loitarán polo título, o Burela Pescados Rubén e o Ourense Envialia. Por outra banda, o Viaxes Amarelle FSF, O Fisgón Futsal e o Valdetires Ferrol pugnarán polo ascenso á Primeira División.
No caso do futsal masculino, o Leis Pontevedra participará no playoff para subir a 2ª División B (xa que o Esteo non formalizou finalmente a súa inscrición), mentres que o Stellae FS, ACD Lugo Sala, A Estrada Futsal e O Parrulo Ferrol FS se xogarán a promoción a 3ª División.
Na especialidade de fútbol, a RFEF e a RFGF confirmaron que no playoff de ascenso de Terceira División a Segunda División B participarán os catro conxuntos galegos clasificados: SD Compostela, Ourense CF, Arosa SC e CD Barco. Xogaranse tres partidos en xullo, en dúas fins de semana consecutivas, nun escenario aínda por determinar. Serán dúas semifinais (primeiro contra cuarto e segundo contra terceiro, a un partido) e non haberá prórroga nin penaltis, polo que en caso de empate ao remate de cada partido accederá á final o equipo mellor clasificado ao remate da fase regular.
