Case mil deportistas inscribíronse xa na X Carreira Popular Hércules e na II Andaina Solidaria #ImportaEMoito. Trátase da segunda proba do circuíto Coruña Corre e forma parte este ano da programación do Día da Muller, 8M. Hoxe, mércores, tivo lugar a presentación oficial, á que asistiron as concelleiras de Deportes, Mónica Martínez, e de Igualdade, Benestar Social e Participación, Yoya Neira.
Tanto a carreira como a andaina celebraranse o sábado 26 de marzo e, como xa é tradición, será a única proba nocturna do circuíto Coruña Corre. As carreiras comezarán ás 17.00 horas. Haberá nove probas de categorías inferiores e está previsto que á carreira absoluta comece ás 20.00 horas.
Unha carreira popular de 6,6km
O percorrido total é de 6,6 quilómetros, a saída estará no paseo dos Menhires e a meta na Torre de Hércules. Ao acto de presentación asistiu tamén José Carlos Tuñas, presidente e adestrador do club Coruña Comarca, que colabora nesta proba. Ademais, Tuñas foi o gran impulsor desta carreira polo parque da Torre de Hércules.
“É esta unha carreira especial polas características da proba, en sábado e pola tarde-noite. O final da proba será a carón do faro milenario símbolo desta cidade, despois de superar algunha que outra costa importante”, sinalou Mónica Martínez.
Mónica Martínez, concelleira de Deportes do Concello da Coruña salientaba que esta cita é: “unha carreira especial polas características da proba, en sábado e pola tarde-noite. O final da proba será a carón do faro milenario símbolo desta cidade, despois de superar algunha que outra costa importante”
Unha andaina solidaria incluída nos actos do 8M
Ademais da carreira, poderase participar na II Andaina Solidaria #ImportaEMoito, que se atopa dentro das iniciativas do Concello da Coruña co gallo do 8M, Día Internacional da Muller, e ten un percorrido similar ao da proba do circuíto.
As persoas que desexen realizala levarán un dorsal solidario cunha cor diferenciada e o número 261, empregado pola primeira muller que correu con dorsal nunha maratón, Kathrine V. Switzer. Os donativos para esta acción solidaria realizaranse a través da web oficial de Coruña Corre e serán de 3 euros, 5 euros ou cantidades superiores. As persoas participantes recibirán un quentador de pescozo conmemorativo.
A entidade que recibirá a recadación íntegra da andaina será Juan Soñador, que leva a cabo accións de acollida e información para mulleres migrantes a través do seu programa Círculos de Mulleres – Malaikas. No acto desta mañá estivo presente Eloína Ingerto, directora territorial da asociación.
Un total de 45 mulleres de 11 nacionalidades comprendidas entre os 31 e 78 anos participan nas actividades dos Círculos. “Con esta colaboración queremos seguir amosando o noso apoio ao tecido asociativo da cidade, así como a aqueles proxectos que traballan a favor da igualdade e o empoderamento das mulleres”, apuntou Yoya Neira.
Inscricións ata o 20 de marzo
A data límite para inscribirse tanto na carreira como na andaina é o 20 de marzo ás 23.59 horas. O custo será de 3 euros polo dorsal máis 2 euros polo chip, coa excepción das persoas desempregadas, maiores de 65 e con Carné Xove, que pagarán 2 euros máis 1 euro polo chip.
Ata o momento hai case mil persoas inscritas nas diferentes carreiras, o que confirma que a participación será moi alta.
Por outra banda, a inscrición no circuíto Coruña Corre estará aberta ata o 1 de maio. Cabe lembrar que só é necesaria a participación en 4 probas para figurar nas táboas clasificatorias do circuíto. As inscricións faranse en liña nas páxinas www.corunacorre.com e www.coruna.gal/carreiraspopulares.
Este ano 2022 A Coruña recuperou o seu circuíto de carreiras populares, o Coruña Corre. Xa se disputaron algunhas citas deste competición que arrincou coa popular de Matogrande celebrada en xaneiro. Esta proba ao carón da Torre de Hércules será a segunda. Logo virán as do 8 de maio, a Baixada Popular de Cross de San Pedro de Visma; o 22 de maio, a carreira dos Rosales; despois da pausa dos meses estivais, xa o 11 de setembro terá lugar a Volta a Oza; seguidas polas probas do 23 de outubro no Ventorrillo e o 27 de novembro en Novo Mesoiro.
