Esta fin de semana, os días 30 de abril e 1 de maio, as remeiras galegas loitarán pola bandeira de Campioas de España de bateis na localidade guipuscoana de Pasaia.
Serán un total de 40 embarcacións as que competirán nas categorías femininas (infantil, cadete, xuvenil e absoluta), das cales 13 botes de dez clubs vogarán baixo a bandeira galega.
Como ven sendo habitual neste tipo de competicións de remo, para acadar unha praza na xornada final do domingo; as galegas deberán rematar nos dous primeiros postos da súa quenda. De non ser o caso, tamén se clasifica para a final o terceiro mellor tempo de ambas quendas, completando así as cinco prazas que dan acceso a loitar pola bandeira de campioas.
A continuación, detallámosvos o cadro de participación por categorías das nosas remeiras, nun campionato que non contará con grandes ausencias destacábeis, como si aconteceu en edicións anteriores do campionato celebradas en Galicia. En total participan 10 clubs e trece bateis. Estas son as tripulacións galegas por categorías:
- INFANTIL: SD Tirán, CR Mecos e Cabo da Cruz.
- CADETE: Robaleira, SD Samertolameu e SD Tirán.
- XUVENIL: Náutico de Riveira, CR Mecos e A Pobra.
- ABSOLUTA: CR Chapela, Cabo da Cruz, CR Ares e Rianxo.
A representación galega nesta ocasión estará moi repartida en augas vascas, onde destacan as moañesas da SD Tirán, as remeiras grovenses do CR Mecos e as boirenses de Cabo da Cruz, que contarán con dúas embarcacións clasificadas para este campionato estatal que dará comezo mañá sábado, 30 de abril, a partir das 10:30 horas.
Consulta o cadro de participación oficial cos clubs participantes en todas as categorías deste Campionato de España de Bateis
Partehartzaileak. Participantes. pic.twitter.com/FQt4GoEd7M
— Gipuzkoako Arraun Federakundea (@federazioa) April 28, 2022
