Na primeira xornada da Liga Guerreras Iberdrola o Conservas Orbe Rubensa BM Porriño caía derrotado pola mínima na casa (26-27) ante o Motive.Co Gijón. Na súa primeira saía na segunda xornada acadou o seu primeiro triunfo en Barakaldo cunha vitoria domicilio (28-31) ante o Zubileta Evolution Zuazo Barakaldo. Tocaba esta terceira xornada volver a feudo propio e resarciuse dese resultado da xornada debut. O bloque que adestra Ismael Martínez impoñíase ao Gurpea Beti-Onak Azparren Gestion (31–27) no pavillón municipal do Porriño.
📆 Jornada 3
⏰ FINAL🆚 @BmPorrino 31-27 @Beti_guerreras
🏟️ Pavillon Municipal de Porriño💪 #AurreraBeti 💚🖤
📸 @xoelgil pic.twitter.com/qmP4Ep3y53
— Gurpea Beti-Onak Azparren Gestión (@Beti_guerreras) September 17, 2022
As galegas ocupan a cuarta praza na clasificación da Liga Guerreras Iberdrola empatadas a puntos e a diferencia de goles coas outras galegas, o Mecalia Atlético Guardés, pero con máis goles a favor, unha circunstancia que as ubica un chanzo por riba das guardesas (quintas).
O Pavillón Municipal do Porriño acollía este sábado un novo enfrontamento da liga Guerreras Iberdrola na terceira xornada. O Conservas Orbe Rubensa BM Porriño enfrontábase ao recentemente ascendido Gurpea Beti-Onak Azparren Gestion. Un equipo que entre as dúas primeiras xornadas de Liga sumara dúas vitorias e o equipo do Val dá Louriña buscaba romper ese refacho.
O equipo navarro foi o encargado de executar o primeiro ataque do encontro e de abrir o marcador a través dun fallo en defensa das porriñesas. O Conservas Orbe Rubensa Bm Porriño non empezara con bo pé, xa que en ataque non acababan de atoparse cómodas e en defensa estaba a custarlles parar os ataques do Gurpea Beti-Onak.
En cuestión de cinco minutos, o equipo visitante había levado o partido ao seu terreo e tiña o marcador ao seu favor cun 1-4. As porriñesas non se atopaban acertadas no lanzamento, o único tanto marcado fora a través dos sete metros lanzados por Malena Vales.
Caro Bono sería a encargada de romper o bloqueo en ataque. Na faceta defensiva, o Conservas Orbe Rubensa Bm Porriño optara por unha defensa con presións na zona da primeira liña, pero Lyndie Tchaptchet estaba a tirar do seu equipo desde o pivote. Aos poucos, o equipo porriñés empezou a espertar do mal comezo cunha defensa moito máis dura e cortando balóns que lle permitiron ir recortando distancias.
Pasados o primeiros quince minutos, o equipo dirixido por Ismael Martínez púxose a un tanto de diferenza cun 6-7 e tras un contrataque de Maider Barros conseguirían o empate. A intensidade na defensa porriñesa fíxose notar, o Gurpea Beti-Onak non daba atacado con tanta facilidade como nos primeiros minutos.
A falta de cinco minutos para finalizar a primeira parte, a defensa porriñesa adiantouse e estaba a conseguir os seus obxectivos, poñéndose por diante no marcador (10-9). Tras volver empatar (13-13, min. 28:45), Isma Martínez decidiu pedir tempo morto coa intención de conseguir irse con vantaxe ao descanso. Con todo, non foi así e chegou o final do primeiro tempo con electrónico en empate (14-14).
O Conservas Orbe Rubensa Bm Porriño empezou a segunda parte cun gol desde os sete metros da especialista, Malena Vales. Este inicio tiña como protagonista a igualdade, xa que foi unha continuo tira e afrouxa entre ambos os equipos.
Chegado o minuto dez, o marcador atopábase a favor do Conservas Orbe Rubensa Bm Porriño cun resultado de 23-18. A máxima diferenza que conseguiran as porriñesas ata ese momento.
O Gurpea Beti-Onak aumentara a súa intensidade en defensa, pero o Conservas Orbe Rubensa Bm Porriño atopábase nun momento doce. En canto á defensa local estaba a ter unha gran axuda desde a portería coa actuación baixo paus de Estela Carrera.
O Porriño colle as rendas do partido e vaise desmarcando
Co paso dos minutos, as porriñesas ían collendo con contundencia as rendas do partido. Chegado o minuto vinte, o marcador continuaba a favor das locais cun 27-21. O equipo navarro buscaba achegarse no marcador, pero as porriñesas continuaban mantendo a distancia.
No 24:37, Ismael Martínez pide un novo tempo morto ao ver que as rivais se poñían a unha diferenza de tres goles. E xurdiu o seu efecto volvendo coller unha diferenza de cinco goles. Os últimos minutos do encontro, as visitantes loitaron ata o final, pero o Conservas Orbe Rubensa Bm Porriño atopábase imparable.
Chegou o final do encontro e o Conservas Orbe Rubensa Bm Porriño sumou as súas dous primeiros puntos en casa diante un gran rival como o Gurpea Beti-Onak Azparren Gestion. O marcador quedou cun resultado de 31-27.
FICHA TÉCNICA
31) CONSERVAS ORBE RUBENSA BM PORRIÑO: Carolina Bono (1), Micaela Casasola (5), Ithaisa Trigo, Alicia Campo (1), Malena Valles (11), Aitana Santomé, Ariana Portillo, Maider Barros (4), Sarai Samartín (1), Paulina Buforn (2), Thais Fermo (1), Carme Castro (4), Marta Groba (1), Estela Carrera, Fátima Ayelén y Begoña Otero.
27.- GURPEA BETI-ONAK AZPARREN GESTIÓN: Adriana Mallo, Ainhoa García, Naiara Retegi, Mariángeles de Uriarte, Ayelén García (6), Lyndie Tchaptchet (4), Eider Hernández (1), Luzía Zamora (1), Natalia Montilla (3), Macarena Sans (1), Paula García (2), Aileen Ripa (4), Valeska Lovera (5), Kássia José, Patricia Encinas y Olaia Luzuriaga.
MARCADOR CADA CINCO MINUTOS: 1-4, 2-6, 5-7, 8-8, 10-9, 14-14 – descanso – 19-17, 23-18, 24-20, 27-21, 28-24, 31-27.
EQUIPO ARBITRAL: A parella arbitral estivo conformada por Luis Colmenero e Víctor Rollan. Por parte do Conservas Orbe Rubensa Bm Porriño excluíron a Thais Fermo e pola banda do Gurpea Beti-Onak Azparren Gestion foron excluídas Mariángeles de Uriarte, Lyndie Tchaptchet, Eider Hernández e Aileen Ripa.
INCIDENCIAS: Partido correspondente á terceira xornada da Liga Guerreras Iberdrola disputado no Pavillón Municipal do Porriño.
