O Viaxes Amarelle FSF volvía á cancha de 40×20 despois de dúas semanas sen competir, tras o confinamento por positivos de COVID-19 detectados na semana previa ao último partido da primeira fase da competición ligueira; e facíao recibindo a visita do AD Sala Zaragoza, e tras un partido moi competido o encontro chegaba ao asubío final con táboas, tras un marcador de 2-2, con goles herculinos de María Gómez e Yaiza Otero.
O partido empezaba cun Viaxes Amarelle FSF envorcado en ataque e cunha presión alta sobre o equipo visitante; e advertindo ás visitantes de que non ían vender baratos os puntos como locais. O Viaxes Amarelle FSF conseguía xogar a un ritmo alto e chegaba con perigo nalgunhas ocasións iniciais, pero as visitantes conseguían adiantarse no marcador cun disparo exterior de Jenifer Souza que vai ao poste. A mala sorte quixo que o balón, no rexeite, tocase nas costas de Leti Rojo, e terminara por coarse na portaría indo dar ás redes herculinas, e subindo o 0-1 ao marcador.
Pese ao gol das visitantes, o Viaxes Amarelle FSF seguía moi metido no partido, e cunha intensidade alta sobre o seu rival, aínda que as visitantes empezaban a xerar ocasións de perigo, onde Leti Rojo destacaba coas súas atalladas.
Chegando á medianía do primeiro período, unha rápida contra que arma Patri Corral desde cancha propia, fai un pase entrelineas a María Gómez, que regatea á porteira visitante e cun balón escorado engancha o balón ao fondo da rede, e así chega a igualada ao luminoso.
Coa igualada de novo no marcador, as herculinas crecéronse na cancha e empezaron a xerar máis perigo por uns minutos; aínda que o partido foi alternando as ocasións para unhas e para outras, destacando as actuacións de defensas e porteiras; que permitiron manter a igualada ao chegar ao tempo de asueto
Adiántanse de novo as mañas
Á volta de vestiarios o AD Sala Zaragoza empezaba máis metido no partido, con máis posesión e tentando xerar máis ocasións; e a pouco máis dun minuto do reinicio do partido, unha perda de balón na saída de presión. Deixaba a Paola en banda, que tocaba ao segundo pau, onde Sara puña o segundo tanto das visitantes, e deixaba o 1-2 no marcador electrónico.
De novo, tocáballe ao conxunto coruñés do Viaxes Amarelle FSF bregar co marcador en contra. Pero as galegas non tiñan pensando rebaixar a súa intensidade en ningún momento. De feito, empezaron de inmediato a artellar xogadas á procura da portaría contraria con ansia de atopar o gol da igualada.
Os minutos pasaban, e o gol non chegaba para a escuadra laranxa, mentres que o AD Sala Zaragoza seguía tentando ampliar distancia buscando a portaría de Leti Rojo, onde a porteira herculina facía un bo papel baixo paus.
Yaiza fixo o 2-2 para o Amarelle
As herculinas empezaban a ser cada vez máis protagonistas no partido, e a falta de pouco máis de cinco minutos María Gómez recibía a pelota en cancha propia e pegaba un tiro a portaría, que repelía Suzan. Na segunda ocasión quen chegou foi Patri Corral cun disparo cruzado que volvía rexeitar a porteira Suzan, e xa á terceira ocasión chegaba a definitiva.
A terceira foi a vencida e Yaiza, coa porteira batida, puña o 2-2 no marcador electrónico do pavillón da Sagrada Familia da Coruña.
Este segundo gol das galegas fixo que o últimos cinco minutos fosen unha toma e daca de ambos os equipos na loita polo tres puntos. Aínda que sen que ningún arriscase co xogo de cinco.
O equipo herculino que adestra Jorge Basanta tivo un par de ocasións moi claras. Unha delas apenas uns segundos máis tarde nun saque de córner que Yaiza tocaba coa barriga. O esférico íase por fóra da meta rival por moi poucos centímetros.
A máis clara de todas as ocasións chegou a falta de 10 segundos do final, e tería suposto un cambio notable para as coruñesas. Foi unha gran xogada por banda de Candela Soria. A futbolista do Viaxes Aamrelle lévase á súa rival e manda o balón ao segundo pau. Alí agardaba coa caña lista Lau Doce, pero un metro antes, Jenifer Souza se adiantaba á xogaba e metía o pé o xusto, para mandar o balón a córner, e desbaratar un gol que parecía cantado. Tiveron ambos os dous conxuntos que se conformar co reparto de puntos froito dun empate a dous goles.
Na seguinte xornada, saída do Amarelle cara a Alacante
Tras a disputa deste primeiro encontro da segunda fase da competición regular, o Viaxes Amarelle FSF regresa o luns aos adestramentos poñéndose unha semana máis ás ordes do seu técnico, Jorge Basanta.
O seguinte reto das herculinas é afrontar un difícil encontro contra un dos rivais máis complicado da segunda fase nesta Primeira División Nacional Feminina de Fútbol sala. As laranxas disputarán a terceira xornada do Subgrupo D visitando á Universidad de Alicante. Será o vindeiro sábado 10 de abril de 2021 ás 18:00 horas no Pavillón Universidad de Alicante (San Vicente do Raspeig) .
FICHA TÉCNICA
VIAXES AMARELLE FSF: Leti Rojo, Lau Doce, Cris Lourés, Patri Corral e Candela Soria – quinteto inicial -. Tamén xogaron: Tana Florentín, Yaiza, Sofía Rodríguez, María Gómez, Patri Romaní e Sandra.
AD SALA ZARAGOZA FS: Suzan, Laura Boix, Livia, Paola e Carmen Alonso – quinteto inicial -. Tamén xogaron: Jenifer Souza, Rapha Martins, Rafiña e Sara.
GOLES: 0-1 Jenifer Souza (min. 5); 1-1 María Gómez (min. 11); 1-2 Sara González (min. 21); 2-2 Yaiza (min. 34).
ÁRBITROS: Lidia Crespo Pardo e Rubén Ferrero Carballal do Colexio de Árbitros de Galicia. Mesa: Berta García Vázquez do Colexio de Árbitros de Galicia. Amonestouse a Diego do Viaxes Amarelle FSF con cartón amarelo e a Carmen Alonso do AD Sala Zaragoza FS tamén con amarela.
INCIDENCIAS: Partido correspondente á segunda jornada del Subgrupo D de la Primera División Nacional Femenina de Fútbol Sala da RFEF disputado o sábado 3 de abril de 2021 no Pavillón Municipal da Sagrada Familia (A Coruña).
