Coruñesas e lucenses, Viaxes Amarelle FSF e Pescados Rubén Burela, tiñan ante si un novo reto de pretemporada para seguir traballando na súa preparación do inicio da competición ligueira. Ambos os dous conxuntos galegos militarán na máxima categoría do FutSalFem estatal: a Primeira División da RFEF:
As xogadoras herculinas fixeron unha gran primeira parte. Aguantaron as arremetidas visitantes e conseguiron adiantarse con dous goles de vantaxe ao descanso (2-0). Pero na segunda parte, o cadro da mariña lucense foi capaz de dar a volta ao partido cun hat-trick de Emilly Marcondes, e terminar cun luminoso reflectindo un 2-4, a favor das visitantes.
Durante a primeira parte do conxunto mariñán tivo moitas imprecisións e erros que as ían a condenar nestes minutos a ir por detrás no electrónico. Non ían demostrar nesta parte o xogo que estaban a executar en partidos anteriores desta pretemporada. Claramente era un CD Burela FS diferente ao que se amosara noutros encontros desta pretempada.
O partido empezaba cun Pescados Rubén Buera FS que quería levar o peso do partido, pero o conxunto herculino non se amedrentaba e presionaba alto a saída de balón das visitantes, e buscaba a portería contraria.
As ocasións chegaban para ambos os equipos, pero as portarías demostraban o seu bo nivel, e o marcador permanecía inalterable co 0-0 inicial.
Os minutos pasaban, e o Viaxes Amarelle FSF mostrábase moi serio, e xa no tramo final do primeiro tempo conseguía adiantarse cun pase filtrado polo medio, que toca Daryna Tkachenko dentro da área para subir o 1-0 ao marcador.
As herculinas poñíanse por diante, e apenas uns segundos máis tarde, Carol Agulla conseguía poñer o 2-0, cunha falta de 15 metros que cruzaba ao segundo pau da porteira visitante e íase ao fondo da rede. Un disparo potente que chegaba xusto antes do descanso.
Con este segundo gol as herculinas, cobraban vantaxe e confianza nun partido que terminaría a súa primeira parte cunha merecida recompensa das herculinas ante o bloque adestrado por Julio Delgado.
CD Burela FS recuperou na segunda metade a súa esencia e deulle un cambio radical ao partido, xogando ao fútbol sala dinámico e coas ocasións que as caracterizan. As laranxas ían obrar unha remontada e outro bo resultado.
Tras o paso por vestiarios, o Viaxes Amarelle FSF adestrado por Jorge Basanta, optou por dar máis minutos ao xogadoras do filial que están a traballar co primeiro equipo, e cunha gran resposta diante de xogadoras que son internacionais coas súas seleccións. Pero pouco antes de chegar á medianía do segundo tempo, Patricia Ortega conseguía recortar distancias cun disparo potente desde dentro da área. A futbolista do equipo da Mariña cazaba un rexeite na área no minuto 27.
A partir dese momento, Emilly Marcondes tería todo o protagonismo e importancia en ataque, pois empataría o partido de penalti no 32 e a continuación, un minuto despois, poñería ao Burela por diante cun canonazo.
O conxunto herculino buscaba a tranquilidade, pero os seus labores defensivos eran maiores que a parte ofensiva, diante un Pescados Rubén Burela FS que quería igualar a contenda canto antes. Pouco despois da medianía do segundo período un penalti a favor das visitantes, era suficiente para que Emilly Marcondes, como indicábamos previamente, subise o 2-2 ao marcador.
Aínda quedaba partido por diante, pero Emilly Marcondes nunha gran xogada persoal conseguía levar ao seu par, e no un para un coa porteira herculina poñía o 2-3 no marcador.
Neste momento, as locais estaban con cinco faltas, e debían medir o tempo do partido, pero aínda así conseguían manter baixo control ao rival, e xerar algunha ocasión de perigo.
Nas postrimerías do encontro, chegaría unha falta das locais, que daba un dobre penalti a favor do equipo dirixido por Julio Delgado e que Emilly Marcondes aproveitaba para certificar un hat-trick, e subir o definitivo 2-4 ao marcador.
Foi un interesante partido de futsal entre dous equipos galegos que se verán as facianas en competición oficial proximamente. Púidose ver un Viaxes Amarelle FSF que pelexou de ti a ti cada balón contra un dos aspirantes a todo nesta nova tempada: o Pescados Rubén Burela. As coruñesas conseguiu levar unha metade para o seu lado, mentres que segunda parte do encontro foi, claramente, para as visitantes. O partido cun 4-2 e Emilly Marcondes como a futbolista máis inspiarada cara a porta, terminou por decantar a balanza de goles a favor do conxunto do Pescados Rubén Burela FS.
O Amarelle xa pensa no Ourense Envialia e na Copa Galicia
Tras este novo test de pretemporada, o conxunto herculino non descansa e dá continuidade ao seu traballo diario para preparar o duelo que terá lugar o próximo sábado, co duelo a partido único en cuartos de final da XVI Copa Galicia Feminina FS. Nese cruce o equipo que prepara Jorge Basanta loitará por unha praza nas semifinais de copa autonómica ante outro rival de a Primeira División da RFEF: o Ourense Envialia.
A cita, xa como partido oficial dentro da Copa Galicia da RFGF, terá lugar o vindeiro sábado 3 de setembro de 2022, a partir das 18:00 horas no Pavillón Municipal da Sagrada Familia no Concello da Coruña. Nese escenario dirimirán coruñesas e ourensás quen continúa adiante na competición galega do KO.
FICHA TÉCNICA
2) VIAXES AMARELLE FSF: Leti Rojo, Cris Lourés, Carol Agulla, Èlia Gullí e Clàudia Lobo – quinteto inicial -. Tamén xogaron: María Gómez, Daryna Tkachenko, Marta Hermo, Carlita, Laura Rivas, Ana Bermúdez e Nere Ramallo.
4) PESCADOS RUBÉN BURELA FS: Jozy, Irene Samper, Emily Marcondes, Patricia e Masha – quinteto inicial -. Tamén xogaron: Cilene, Antía, Dany e Evelina.
GOLES: 1-0 Daryna (min. 18); 2-0 Carol Agulla (min. 19); 2-1 Patricia (min. 27); 2-2 Emilly (penalti) (min. 32); 2-3 Emilly (min. 33); 2-4 Emilly (doble penalti) (min. 39).
EQUPO ARBITRAL: Piñeiro Rivas Sergio e López Riveiros Sergio, ambos os dous do Comité Técnico de Árbitros da Coruña. Na Mesa estivo Lucía Manso Porteiro, tamén do Comité Técnico de Árbitros da Coruña. Amosaron cartón amarelo a Dany, futbolista do Pescados Rubén Burela FS.
INCIDENCIAS: Partido amigable de pretempada disputado no Pavillón Municipal da Sagrada Familia na Coruña.
