- Ale de Paz, Antía Pérez, Martita e Vane Sotelo formarán parte do primeiro Mundial de Fútbol Sala Feminino da historia.
- Irene Samper, Peque e Dany Domingos, as tres con pasado en Galicia, tamén foron seleccionadas por Clàudia Pons para viaxar a Filipinas.
Tras anos de espera e reivindicacións constantes por parte de xogadoras, clubs e afección, por fin é oficial: o primeiro Mundial de Fútbol Sala Feminino xa é unha realidade. A competición celebrarase en Filipinas entre o 21 de novembro e o 7 de decembro, converténdose nun momento histórico para este deporte. A estrea do torneo non só supón un avance institucional, senón tamén un símbolo de progreso e visibilidade para milleiros de deportistas e membros dos corpos técnicos, que levan anos traballando na sombra.
Galicia, cunha traxectoria de décadas como epicentro e referencia do futsal nacional, volverá demostrar por que é unha das canteiras de talento máis destacadas do panorama actual, nesta ocasión na primeira Copa Mundial Femenina de Fútbol Sala de carácter oficial.
A comunidade galega, que leva anos colocándose na vangarda deste deporte, sendo berce de xogadoras, adestradores e clubs de máximo nivel no fútbol sala, terá presenza nesta cita histórica da man de tres dos seus mellores talentos: Ale de Paz, Antía Pérez, Marta López-Pardo Martita e Vane Sotelo.
Alejandra ‘Ale’ de Paz
Nacida en Neda (A Coruña), o 25 de maio de 1995, e coñecida deportivamente como Ale de Paz, é considerada unha das referencias do fútbol sala actual.
Adoita ocupar a posición de ala–peche, xa que sobresae pola súa polivalencia ao ser quen de ocupar diferentes roles na pista. Destaca por ser unha xogadora desequilibrante e con gran calidade de pase.
Comezou a súa traxectoria na Fervenza e, máis adiante, deu o salto ao Valdetires Ferrol, club co que se estreou na Primeira División na tempada 2013-14. Tras dúas campañas, chamou á súa porta o Poio Pescamar, onde continuou a súa progresión.
En 2019 incorporouse ao Burela FS, etapa que marcaría un antes e un despois na súa carreira. Foi durante a súa estancia no equipo mariñán cando conquistou 11 títulos e consolidouse como unha das xogadoras máis destacadas da liga.
Na tempada 2022-23 apostou polo Marín Futsal, aínda que a súa estadía foi breve. Un ano despois, regresou ao Poio Pescamar, club ao que volveu para afrontar unha nova etapa na elite do fútbol sala.
Foi convocada por primeira vez coa selección estatal de fútbol sala en 2019, para disputar dous partidos amistosos e só tres anos despois, en xuño de 2022, gañou a súa primeira Eurocopa; título que revalidaría en 2023.
Hoxe, Ale de Paz, aterriza en Filipinas como unha das figuras máis importantes do futsal nacional e pisa o escenario que tantas soñaron e tan poucas puideron conquistar.
Antía Pérez
Nacida en Laza (Ourense), o 21 de xuño do 2000, Antía Pérez forma parte da plantilla actual do FSF Castro Bloques Cando, despois de finalizar a súa etapa no CD Burela FS. Catalogada como unha das futbolistas con máis proxección do panorama estatal, destaca pola súa presencia física, que lle permite competir con garantías nas disputas e pola eficacia en situacións de finalización preto da área rival.
Tras pasar por algúns equipos históricos da escena deportiva estatal, coma o Ourense CF (antes Ourense Envialia FSF agora Ourense OnTime), o Poio Pescamar ou o CD Burela FS, Antía Pérez chega ao Mundial de fútbol sala feminino coa intención de consolidarse como unha xogadora clave na selección estatal, coa que debutou ante Arxentina en 2023 despois de superar dúas graves lesións de xeonllo.
Tras deixar atrás eses malos momentos, hoxe Antía Pérez, afronta unha nova etapa, lista para saborear o premio ao seu esforzo: formar parte da convocatoria da selección española para o primeiro Mundial da historia.
Marta López-Pardo ‘Martita’
Nacida en A Coruña, o 19 de marzo de 2001, e coñecida no ámbito deportivo como Martita, figura como como peche na web do Poio Pescamar, aínda que a súa posición oficial recollida nas bases da RFEF, e coa que vai convocada coa Selección Española, é a de ala. É unha das xogadoras con máis continuidade no proxecto do club pontevedrés.
A coruñesa, afronta nesta campaña a súa quinta tempada defendendo a camiseta vermella, converténdose, xunto a Anna Escribano, na futbolista que máis cursos leva de forma ininterrompida no club. Consolidouse como unha peza clave no esquema de Luis López-Tulla, afianzándose como unha xogadora clave sobre a pista. A súa importancia dentro do equipo reflíctese tamén no vestiario, onde exerce como capitá.
Con anterioridade á súa chegada ao Poio Pescamar, Martita desenvolveu a súa formación no Viaxes Amarelle FSF, un dos clubs de referencia en Galicia, destacando xa daquela como unha das promesas máis firmes do fútbol sala galego.
Pese a súa xuventude, formar parte da Selección Española de fútbol sala non é algo novo para ela. Xa foi unha habitual nas convocatorias do combinado español Sub-17 e Sub-19, e chegou a participar nos Xogos Olímpicos da Xuventude, en outubro de 2018, con España.
Nos últimos anos, foi citada para diversas concentracións da absoluta e, finalmente, acadou o seu gran obxectivo: entrar na lista para o Mundial 2025, pasando así á historia como unha das escollidas para competir na primeira edición do torneo.
Vanessa Sotelo
Nacida en Ourense, o 21 de agosto de 1995, coñecida baixo o nome de Vane Sotelo, milita na actualidade nas filas do Arriva AD Alcorcón, onde ocupa a posición de pívot. Recoñecida como unha das grandes estrelas do futsal da historia recente, estivo nominada ao galardón de mellor xogadora do mundo en 2014, 2015 e 2020.
A súa carreira profesional levouna a defender as cores de clubs como o Cidade das Burgas FS, o Ponte Ourense FSF, o Futsi Navalcarnero, co que seguiu medrando en experiencia; ou o Arriva AD Alcorcón, entidade na que xa militara en tempadas anteriores e á que regresou consolidada como unha das xogadoras máis relevantes do panorama estatal.
Vane Sotelo é a máxima goleadora da historia da Selección Española, un logro que resume á perfección a súa traxectoria e eficacia de cara a portería. Este recoñecemento non fai máis que consolidar o seu papel de referente e permitirlle chegar a Filipinas como unha auténtica institución do fútbol sala mundial.
Galegas de corazón
A pertenza a un territorio non sempre está ligada ao lugar de nacemento, senón ás experiencias e ás relacións construídas ao longo do tempo. Irene Samper, ex xogadora do CD Burela FS e actual militante do Melilla CD Torreblanca; e Patricia González Peque, tamén con pasado no Burela, e agora xogadora do LBTL Futsal Alcantarilla, son un exemplo claro desta realidade.
A primeira Irene Samper, nacida en Zaragoza, e a segunda, Peque, en Madrid, desenvolveron parte da súa carreira en Galicia, onde deixaron unha pegada inesquecible no fútbol sala da comunidade.
Memorable tamén foi o paso de Dany Domingos polo Burela FS, equipo no que militou varias tempadas repartidas en dous períodos diferentes. A pívot hispano-brasileña defende actualmente as cores do LBTL Futsal Alcantarilla, e chega a Filipinas cunha ampla experiencia en conxuntos de primeiro nivel, unha veteranía que pode resultar moi valiosa para o cadro español.
As tres forman parte tamén da lista da seleccionadora estatal de fútbol sala, Clàudia Pons, e viaxaron a Manila xunto ás súas compañeiras, para participar na cita mundialista.
Así chegou España ao Mundial de futsal e así buscará chegar á final
