O pavillón Valle Inclán do Concello de Oleiros na Coruña acolle esta fin de semana o I Campionato galego de Ximnasia estética de Grupo.
Esta disciplina baséase no movemento natural do corpo. Garda certa relación coa Ximnasia Rítmica, pero ten notables variacións con ela. A Ximnasia Estética é, aínda, unha descoñecida polo gran público. Con todo, suma practicantes ano tras ano en Galicia. Unha das diferencias é que non se empregan aparatos para desenvolver as coreografías sobre o tapiz.
En total, nesta tempada, está previsto que se levan a cabo dúas fases autonómicas dentro do Campionato Galego de ximnasia Estética de Grupo, a primeira será esta que o domingo 1 de marzo acollerá o Concello de Oleiros. Alí o Club Acordes exercerá de anfitrión.
Boa parte dos diferentes clubs desta disciplina na nosa comunidade reúnense na Asociación Galega de Ximnasia Estética de Grupo (AGAXEG) e no ámbito estatal na AEGEG (Asociación Española de Gimnasia Estética de Grupos) que é socia fundadora e integrante da Federación Internacional de Gimnasia Estética de Grupo.
Para coñecer algo mellor esta disciplina, ademais de acudir a esta primeira fase do campionato autonómica de grupo, pódese visitar o apartado da web da AEGEG onde se explica a técnica desta disciplina deportiva, alí se explica que os movementos corporais básicos son ondas, swings e contracións.
