A quinta xornada da Liga F foi a da primeira derrota en Riazor do Dépor ABANCA que enfronte tiña ao Madrid CFF. Cada unha das dúas metades tivo un dono, a primeira foi para as visitantes e a segunda para as locais. Houbo tamén dous goles no final de cada período que marcaron o resultado, ambos das madrileñas. Chegou a empatar o conxunto coruñés cun gol da canteirana Paula Monteagudo, pero ese segundo tanto do Madrid CFF no minuto 88 decantou o encontro. E tamén houbo dous penalties, un non se chegou a pitar e o outro asubiouse e serviulle ás visitantes para abrir o marcador.
Por momentos, dá sensación de que este Dépor ABANCA aínda está en construción, o cal é lóxico no punto da tempada na que estamos. Con todo, amosa unha enorme dependencia do acerto de Inês Pereira baixo paus e da maxia e a calidade na elaboración de xogadas que sempre ten como aliada inquebrantable a catalá Ainhoa Marín que é o pirixel en todas as salsas.
As achegas destas dúas xogadoras desequilibrantes non abondou desta volta e o Madrid CFF foi quen de levar os tres puntos do Estadio Municipal Riazor-ABANCA. Foi a primeira derrota da tempada na Liga F como locais das branquiazuis. As madrileñas anotaron dous tantos xusto na linde do final de cada período. O Dépor ABANCA chegou a empatar, pero no segundo tanto o equipo adestrador Fran Alonso non tivo tempo de reacción.
Fran Alonso optou polo esquema de xogo que está a pór en liza neste arranque de tempada. Mudando nomes, pero co mesmo debuxo. Na portaría Inês Pereira, na zaga Barth, Vera e Henar, con Samara e Monteagudo nas bandas; no medio campo Marina Artero e Paula G. e na zona de arriba Olaya polo medio e nos extremos Ainhoa Marín e Marisa.
Aos 8 minutos de xogo chegaba o primeiro tiro do Madrid CFF. Un disparo feble e raso, pero entre os tres paus que chapou Inês Pereira. A seguinte chegada visitante foi pola dereita e Olaya envía a córner.
Contra do minuto 13 de partido unha nova acción a balón parado, outra vez un saque dende o curruncho leva perigo á área deportivista. Paséase o esférico e ten que evitar o gol Inês Pereira. No primeiro cuarto de hora de encontro o perigo era responsabilidade do bando visitante.
O técnico, Fran Alonso, tivo que consumir un cambio superados os 20 minutos de encontro por lesión de Samara Ortiz que deixou o seu sitio a Paula Novo.
Seguía apretando o Madrid CFF que no minuto 23 enviaba un tiro cruzado que atallaba a cancerbeira lusa Inês Pereira. Xusto na seguinte xogada producíase un contragolpe do Dépor ABANCA, pero o intento quedaría en nada.
Repetíanse no equipo local as imprecisións, as perdas de balón e o Dépor ABANCA sufría por que o Madrid CFF gañaba ata os balóns divididos. No minuto 30 vivíase un novo tiro entre os tres paus do Madrid CFF. Por sorte os seus intentos de perforar a porta deportivista non tiñan marchamo de gol e sempre estaba atenta Inês Pereira. A lusa é un seguro de vida para o Dépor ABANCA.
Contra do minuto 38 chegaría a mellor ocasión do Dépor ABANCA na primeira metade. Foi froito da presión de Ainhoa Marín nun saque de porta. A futbolista rouba o balón e monta unha ocasión que Marisa no foi quen de transformar, pero que fixo espertar á grada.
Pouco despois as locais pedirían penaltie de Mónica sobre Paula. A colexiada revisiou as imaxes no VAR pero considerou que houbera nada sancionable.
Gol do Madrid CFF no tempo extra
Os oito minutos de tempo engadido foron, posiblemente, os mellores minutos do Dépor ABANCA. Pero tamén foi aí onde recibiu o primeiro mazazo.
Aos seis minutos de tempo extra a colexiada Raquel Suárez asubía penalti. Esta vez, logo de revisar o VAR, confirma a súa decisión. Desde o punto fatídico Mónica anotaba o 0-1 para as visitantes. Inês Pereira tirouse ao lado correcto pero non chegou a atallar o esférico.
Ese tanto foi unha xarra da auga fría nos ánimos deportivistas. Cando mellor o estaba a facer recibiron o golpe dun gol dos chamados psicolóxicos que chegaba xusto antes de poñer rumbo de vestiarios. Entre o penaltie e a revisión da xogada no video arbitraxe chegouse aos 13 minutos de xogo engadido.
Arrincou a segunda metade cun Dépor ABANCA adiantado e optando por unha presión alta á procura de darlle a volta ao marcador logo do pau recibido nos últimos compases do primeiro tempo. Viuse un Dépor máis incisivo e loitador.
No minuto 52 producíase un tiro a porta do Dépor ABANCA que safa a porteira visitante, pero que provoca un córner que volvía a dar alas ás galegas. O saque de Monteagudo foi tan pechado que marchou fóra.
Pouco despois, contra o 56 de partido, foi Marisa quen disparou a porta sen éxito. Puido ser das xogadoras que máis balóns tocou e que estivo en máis xogadas, pero a futbolista non tivo o día no que a acertos se refire. Polas súas botas pasaron moitos balóns Dépor ABANCA, pero as cousas non semellaban saírlle como ela quería. Desesperábase. Dáballe á cabeza. O esférico, nesta xornada non a quería.
Paula Monteagudo empata para o Dépor ABANCA
Corría o minuto 68 de partido cando chegou o premio para as branquiazuis en forma de empate 1-1 cun gol que asinaba Paula Monteagudo. A canteirana meteuse no medio da área e soubo aproveitar sen dúbidas o pase de Ainhoa Marín que entraba desde a dereita, e mandoulle a pelota ao oco. Ese lugar foi perfecto para que á Monteagudo se adiantase á xogadora madridista que a cubría e encarase porta con seguridade. O seu disparo perforou a meta rival e colocou o 1-1 no marcador de Riazor. O público celebrou o empate e soñou coa remontada.
E puido darse cando no minuto 73 Ainhoa Marín collía un envío en velocidade, freábase en seco deixando clavada á rival que a cubría e levándose consigo ata a tres xogadoras. A 14 deportivista viu perfectamente como entraba soa Marisa. Envioulle o esférico cunha asistencia que era medio gol, pero a deportivista enviou o seu tiro por fóra dos tres paus cando a grada xa case que cantaba o gol. Definitivamente non era o seu día.
Tras unha segunda metade para o Dépor ABANCA e coas táboas no marcador chegaría o segundo mazazo para As Nosas deportivistas. Foi no minuto 88 cando o Madrid CFF volvía a adiantarse no marcador cun gol de Mendoza. A colexiada volveu revisar a xogada na pantalla e deu por bo o tanto visitante que colocaba o electrónico 1-2.
Outra vez co pitido final a tiro de pedra marcaban as visitantes e o Dépor ABANCA tiña que poñer toda a carne no asador para intentar que os tres puntos non marchasen de Riazor. Púxoo ata o remate do partido (con 6 minutos de engadido neste segundo acto), pero non houbo sorte. Os tres puntos voaron e as galegas colleitaron a súa primeira derrota como locais neste curso 2025-26. A segunda consecutiva do conxunto que adestra Fran Alonso.
A vindeira xornada as deportivistas visitarán o domingo 5 de outubro a partir das 12:00 horas ao Alhama ElPozo, arestora o seu inmediato perseguidor na táboa clasificatoria da Liga F onde as galegas ocupan o posto 9.º con cinco partidos xogados, 1 gañado, 2 empatados e 2 perdidos.
FICHA TÉCNICA:
1) RC DEPORTIVO ABANCA: Inês Pereira; Samara (Paula Novo, min. 20), Barth, Vera, Henar (Eva Dios, min. 61), Monteagudo, Marina Artero (Elena, min. 61), Paula Gutiérrez, Olaya (Millene, min. 80), Ainhoa Marín e Marisa (Bárbara, min. 80).
2) MADRID CFF: Belén de Gracia; Allegra Poljak, Mónica (Esther Laborde, min. 83), Sandra Villafañe, Nuria Mendoza, Alba Ruiz (Kamilla Melgard, min. 83); Marcetto, Natasha Andonova (Emilie Nautnes, min. 57), Ángela Sosa (Hildur Antondóttir, min. 70); Anita Marcos, Marina Rivas (Nerea Sánchez, min. 70).
GOLES: 0-1: Mónica (min. 45+12) (penalti). 1-1: Paula Monteagudo (min. 68). 1-2: Mendoza (min. 88).
EQUIPO ARBITRAL: Raquel Suárez, do Colexio de Castilla y León. Amonestou con cartón amarelo ás futbolistas locais a Marisa (min. 28) e Henar (min. 45+6), e a Villafañe (min. 55) no conxunto do Madrid CFF.
INCIDENCIAS: Partido correspondente á 5.ª xornada da Liga F disputado no Estadio Municipal Riazor-ABANCA diante de 1.340 espectadores nunha tarde solleira na Coruña. Nas gradas moitas persoas coa camiseta rosa da Carreira da Muller celebrada esta mesma mañá na cidade da Coruña.
Ver esta publicación en Instagram
- MELLORES MOMENTOS DO PARTIDO DÉPOR ABANCA VS MADRID CFF
- ROLDA DE PRENSA DE FRAN ALONSO, ADESTRADOR DO DÉPOR ABANCA
