Un único gol en contra. Unha única derrota no casilleiro. A primeira da tempada. E como resultado o Dépor ABANCA cede o liderado da Primera Federación Iberdrola. O RCD Espanyol tirou partido do solitario gol que Mar anotaba no minuto 17 de partido e do seu control do xogo antes do descanso. O tanto das pericas supuxo a primera e única derrota das Nosas no que vai de curso nun partido que perderon 1-0 e no que loitaron ata o final sen fortuna. A primeira parte foi das locais e a segunda das galegas, pero as xogadoras que adestra Irene Ferreras non conseguiron ver porta.
O Dépor ABANCA cede o primeiro lugar na categoría de prata do futfem estatal na súa visita ao Dani Jarque. O RCD Espanyol, outro dos aspirantes ao ascenso a elite, dobregou ás galegas e arrebaoulles os tres puntos e o liderado.
O partido estivo parado durante preto dunha hora debido ao diluvio que caeu sobre o terreo de xogo durante o descanso e que converteu ao tepe nun terreo de xogo castigado pola choiva. A superficie, de herba artificial, non era quen de evacuar a auga caída e os operarios do Dani Jarque traballaron arreo para liberar auga e que se puidese seguir xogando o partido.
O RCD Espanyol controlou o partido a primeira parte
O primeiro tempo do partido foi para as locais que puxeron en apuros ás galegas do Dépor ABANCA ata que no minuto 17 conseguían perforar a meta defendida por Yohana. A autora do gol foi Mar de cabeza a centro da súa compañeira colombiana Daniela Caracas.
O Dépor ABANCA non tirou a porta en toda a primeira parte. No descanso chegou o diluvio. A cantidade de auga caída nos 15 minutos de parón foi tal que Xiomara Díaz García, colexiada do encontro, mandou aos equipos de volta aos vestiarios.
Os operarios do @RCDEFemeni traballan arreo para que poida continuar o partido contra o @RCDeportivoFem
👉 Mentres, no campo anexo os xogadores do @RCDEspanyol adestran con normalidade
Todo apunta a que se vai reanudar en breve
En directo na G2 e G24📲 https://t.co/r0uJKY6kgo pic.twitter.com/jgfc67aJsv
— En Xogo tvG2 (@EnXogo_tvG2) October 15, 2023
O campo anegouse e a pelota non botaba ben nalgunhas partes do terreo de xogo, polo que a reanudación do xogo demorouse 50 minutos sobre o horario previsto logo de que a árbitra insular determinase que se podía seguir xogando.
Con case 50 minutos de atraso, comeza o segundo tempo con 40 minutos de atraso! #RCDEFemDéporABANCA 1-0! Podes seguir o encontro en 📺 @TVGalicia 2 e https://t.co/bRUzdiizbw! pic.twitter.com/PMV80AELle
— Dépor ABANCA (@RCDeportivoFem) October 15, 2023
E como se coa chuvia estivese no seu elemento (pese de ser un campo de herba artificial no que as galegas están menos cómodas) o Dépor ABANCA rexurdiu e foi un equipo completamente distinto no segundo período.
Agora si as nosas deportivistas controlaron o tempo do xogo, a posesión e xeraron ocasións. Ainhoa Marín volveu a ser incisiva cara á área rival, e Ana de Teresa tivo ata dúas das ocasións máis destacadas. AdT entrara en substitución de Millene.
O Dépor ABANCA intentouno ata o asubío final pero sen éxito nas súas chegadas que na recta final perderon pegada.
A clasificación queda co RCD Espanyol líder con 13 puntos, seguido do Dépor ABANCA con 12 e o SE AEM, que é terceiro con 11 puntos.
FICHA TÉCNICA
1) RCD ESPANYOL: Salvador, Daniela Caracas, Simona Botero, Guerra, Lucía Vallejo (María Barquero, min. 57), Carol (Laia Jordán, min. 86), Ana Hernández, Ángeles (Judit Pablos, min. 64), Mar, María Lara (Júlia Serrat, min. 46) e Lice Chamorro.
0) RC DEPORTIVO ABANCA: Yohana, Samara, Inés Altamira, Raquel García, Elena, Henar, Ayaka (Lía, min. 88), Ainhoa Marín (Carlota, min. 62), Paula Gutiérrez, Laurina (Charle, min. 62) e Millene (Ana de Teresa, min. 46).
GOL: 1-0 Mar (min. 17).
EQUIPO ARBITRAL: Xiomara Díaz García (colexio canario). Amosou cartón amarelo á futbolista deportivista Ainhoa Marín (min. 44), a Guerra (min. 50), a Ana Hernández (min. 83) e á adestradora das galegas Irene Ferreras (min. 90+1).
INCIDENCIAS: partido correspondente á 5ª xornada de Primera Federación Iberdrola disputado no campo 3 da Ciudad Deportiva Dani Jarque (Sant Adrià de Besòs). O inicio da segunda metade demorouse 50 minutos sobre o tempo previsto por mor da chuvia caída no descanso que limitaba o bote do esférico nalgunhas zonas do terreo de xogo. O partido foi transmitido pola TVG.
