- O Atlético Guardés dominou durante a primeira parte, pero o BM Porriño remontou grazas a unha defensa infranqueable.
- O Mecalia só anotou un gol nos primeiros 14’.
“A paixón que nos une” é o lema desta tempada do Club Balonmano Porriño. Ese sentimento é o que tentan mostrar as xogadoras do Conservas Orbe Rubensa en cada partido, pero o derbi é unha data especial para o balonmán galego. Por iso, este 5 de novembro estaba a ser esperado con ansias polas xogadoras do Conservas Orbe Rubensa Bm Porriño ao igual que o facían as do Mecalia Atlético Guardés. O triunfo final quedou na casa, no Porriño pero pola mínima (23-22) nun partido tremendamente igualado.
Parecía que o Mecalia Atlético Guardés tíñalle tomada a medida ao Porriño durante a primeira parte do derbi galego, pero o equipo local anulou a boa serie do conxunto miñoto nos últimos 30 minutos cunha defensa impenetrable que fixo que o marcador se investise ao seu favor pola mínima (23-22).
O Pavillón Municipal do Porriño desde primeiras horas da mañá xa se notaba con ese ambiente, toda a canteira do club local citábase para montar todos os preparativos. Por iso, tras unha apertura moi especial no que gaiteiros tocaron o himno de Galicia, o derbi daba comezo.
O Mecalia Atlético Guardés abría o encontro, pero con diante unha defensa porriñesa concentrada perderon a primeira bóla para sumar o primeiro gol do partido da man da capitá, Sarai Samartín. A resposta visitante foi inmediata co tanto da internacional Pauli Fernández.
O Mecalia Atlético Guardés comezou a ter efectividade nos seus lanzamentos. Por iso, no primeiros cinco minutos o Conservas Orbe Rubensa BM Porriño atopábase dous goles por abaixo (1-3), pero querían manterse en partido e ben o sabía Buforn que volvería poñer a un ao seu equipo.
No minuto oito, Malena Vales volvería instaurar a igualdade no electrónico (4-4). A defensa 6:0, marca da casa, non terminaba de funcionar, xa que as guardesas estaban a conseguir entrar sen problema. Tamén se estaban atopando con dificultades onde as intervencións en portería de Estela Carrera estaban a lastrar ás locais. Chegado o primeiro cuarto, o Conservas Orbe Rubensa BM Porriño volvía ter o resultado na súa contra (4-8).
O conxunto do Porriño atopábase atrancado, tanto en defensa como en ataque, e tras o paso dos minutos necesitaban unha reacción. Entrado o minuto 20, cun 6-10 no resultado, a especialista en sete metros, Malena Vales, batía a Sempere para reducir distancia.
O Mecalia Atlético Guardés non daba tregua ás porriñesas que xa empezaban a probar cambios no seu sete. No 22:49 Isma Martínez solicitou o seu primeiro tempo morto ao ver que o seu equipo atopábase bloqueado.
O Conservas Orbe Rubensa BM Porriño necesitaba máis claridade en ataque ante unha defesa visitante que estaba intratable. Entrados na recta final do primeiro tempo, os erros e as présas estaban a pasar factura. As deportistas que adestra Isma Martínez necesitaban contundencia e acerto no lanzamento.
Cristina Cabeza no minuto 28:09 solicitou un novo tempo morto. Con Cacheda ao mando, a xogada ensaiada acababa co gol de Palomo. O xogo das porriñesas non terminaba de funcionar e chegou o final da primeira parte co resultado estaba en contra para as do Porriño (10-15).
Estela Carrera foi unha das grandes protagonistas durante os primeiros 30 minutos, pois conseguiu deter oito lanzamentos das porriñesas, que perdían no electrónico ao final da primeira metade logo de que o Guardés dominarse o partido no primeiro acto, cun ataque veloz e unha defensa férrea.
Reacción do Porriño no segundo acto
O segundo tempo renovouse con gol ao contrataque de Elena Amores. Nada facía presaxiar o cambio de papeis que se ía a producir no derbi, cunha seca goleadora do Mecalia Atlético Guardés inesperada; non conseguiu marcar o segundo tanto ata o minuto 14 da segunda parte, cun lanzamento desde os 7 metros de África Sempere.
O conxunto da garda que contaba con xogadoras fintadoras como Cacheda e Fernández atopouse cunha defensa local moito máis adiantada para dificultarlle o movemento de bóla e levalas ao pasivo.
A pesar diso, defensivamente o Mecalia Atlético Guardés continuaba moi enchufado. Transcorridos os 10 primeiros minutos da segunda parte, o marcador do Porriño continuaba a favor das da Guarda cun 12-16.
Cun parcial de 4-1 nos primeiros 12 minutos, Cabeza volvería solicitar tempo morto. As do Porriño necesitaban continuar coa boa serie e na que a axuda en portería de Palomino estaban a ser fundamentais.
O Conservas Orbe Rubensa BM Porriño conseguiu o empate a través de Casasola e co que volvería soñar pola vitoria xunto á súa afección. Minuto 16:27, a canteirá Aitana Santomé puxo por primeira vez por diante ao seu equipo, pero Elena Amores non perdoou.
Parecía que o Conservas Orbe Rubensa BM Porriño atopaba a fórmula na recta final do derbi. A falta de 10 minutos e un gol arriba (19-18), ao equipo local faltáballe un empuxón na faceta ofensiva, pero Buforn volvería aparecer para poñer a diferenza de dous goles. Os minutos seguían correndo, esta vez, a favor das xogadoras do Conservas Orbe Rubensa BM Porriño.
Últimos cinco minutos, as do Porriño non dubidaban e estaban totalmente metidas en partido. O 22-20 para as locais facía vibrar o pavillón e cada unha das xogadoras porriñesas que entraban a pista achegaban a súa mellor versión. Quedaban tres minutos para a conclusión e Pauli Fernández poñería o 22-21.
Minuto 28:42 e o técnico local solicitou tempo morto para preparar a que podía ser a xogada que marcaría o partido, pero non terminaría en gol. A falta de 45 segundos para a conclusión, Cristina Cabeza solicitou outro tempo morto co marcador na súa contra (23-21).
Cifuentes co pase de Cacheda sumaría un gol á conta das visitantes, pero as do Porriño non deron tregua. Finalemte, o Conservas Orbe Rubensa BM Porriño sumaría os dous puntos do derbi galego e cun resultado final de 23-22 para as locais.
́
Estos FOTONES nos transportan al ambientazo vivido en el derbi gallego entre @BmPorrino y @Atlguardes_ofic (23:22)#LigaGuerrerasIberdrola #SheLovesHandball pic.twitter.com/K9kOkHZE8G
— Liga Guerreras Iberdrola (@IberdrolaDHF) November 6, 2023
FICHA TÉCNICA
23) CONSERVAS ORBE RUBENSA BM PORRIÑO: Carolina Bono, Mica Casasola (5), Alicia Campo (1), Malena Valles (7), Inés Hernández, Aitana Santomé (1), Aroa Fernández, Maider Barros (1), Sarai Samartín (1), Paulina Buforn (3), Carmen Prelchi (2), Thais Fermo, Carme Castro, Maddi Bengoetxea (2), Ayelén Rosalez y Ana Palomino.
22) MECALIA ATLÉTICO GUARDÉS: África Sempere (5), Blazka Hauptman (3), Cecilia Cacheda (1), María Palomo (3), Paula Fernández (3), Cristina Cifuentes (1), Andreza Costa, Elena Amores (3), María Sancha, Ania Ramos (2), Itiziar Martínez (1), Sandra Radovic, Miriam Sempere y Estela Carrera.
MARCADOR CADA 5 MINUTOS: 1-3, 4-5, 4-8, 6-10, 8-13 e 10-15 – descanso – 12-16, 12-16, 16-17, 19-18, 22-20 e 23-22.
EQUIPO ARBITRAL: A parella arbitral estivo formada por Alejandro Hoz e Axel Riloba. Por parte do Conservas Orbe Rubensa Bm Porriño excluíron a Carmen Prelchi. Nas filas do Mecalia Atlético Guardés excluíron a Blazka Hauptman e Cristina Cifuentes.
INCIDENCIAS: Partido correspondente á décima xornada de la Liga Guerreras Iberdrola. O partido foi transmitido pola CRTVG.
Rematou o da @IberdrolaDHF @BmPorrino 23-22 @Atlguardes_ofic
Dominou o Guardés a primeira metade (chegou a ter un 8-14)
Remontou o Porriño na segunda cun parcial de inicio de 6-1 acabou levando o partidoVímolo na G2 e G24 pic.twitter.com/nSpGnf9E38
— En Xogo tvG2 (@EnXogo_tvG2) November 5, 2023
